Novamente as augas do río Sil acollerán en maio unha triple cita nacional de descenso de augas bravas, que ademais será campionato galego. Así, na fin de semana do 11 e 12 de maio as augas do río Sil serán escenario dunha Copa de España nas modalidades clásica e sprint individual (a segunda do calendario da liga española tras a de Lleida), así como do Campionato de España de patrullas clásica. A cita, que será clasificatoria para o mundial nas probas individuais, prevé reunir a uns 140 padexeiros de 18 clubs españois (de Galicia, Asturias, Castela e León, Cataluña e Baleares).
A novidade desta edición será o cambio no percorrido, que se desenvolverá en tramos do río Sil do Barco e de Vilamatín, tal e como adiantaban os promotores da proba, o Fluvial Barco e a Federación Galega de Piragüismo, nunha rolda de prensa celebrada este mediodía e na que estaban acompañados pola deputada delegada especial para Valdeorras da Deputación de Ourense, María Carmen González; do concelleiro de Deportes do Barco, Aurentino Alonso; e do xefe territorial de Deportes en Ourense, Manuel Pérez.
O programa da competición iniciarase o sábado 11 de maio ás 15h. coa Copa de España sprint (velocidade) individual, cuxo percorrido, duns 300 m, situarase nas proximidades da pasarela do Salgueiral.
Xa o domingo ás 10h. darase paso á Copa clásica (de resistencia) individual ás 10h. e ás 11:30h. disputarase o Campionato de España de patrullas clásica. En ambos casos a saída darase á altura das piscinas descubertas do Barco e a meta fixarase no antigo campo de fútbol de Arcos (Vilamartín de Valdeorras).
Na presentación o Fluvial Barco adiantaba que o club estará representado por 15 piragüistas e destacaba que a proba está patrocinada por Iberdrola. Ademais, a deputada provincial María Carmen González felicitaba aos organizadores por este evento deportivo, que dinamiza o río Sil, pero tamén lles pedía a súa implicación para que este tipo de iniciativas tivesen máis repercusión socioeconómica na comarca. Pola súa banda, Manuel Pérez destacaba a traxectoria do Club Fluvial Barco, de xeito especial na disciplina de augas bravas, e os seus logros a nivel organizativo e de resultados deportivos.
Nese mesmo senso, o concelleiro barquense Aurentino Alonso, salientaba que o club “ten presente, pero tamén moito futuro, porque xa hai promesas moi interesantes nel e que lle van dar continuidade a isto”.
