O programa da competición nacional de descenso de augas bravas que nesta fin de semana se desenvolve en Valdeorras iniciábase ás 15h. deste 25 de abril coa primeira manga da Copa de España sprint (velocidade) individual, cuxo percorrido sitúabase desta volta na zona do Cachón, no Barco. O comezo da segunda manga estaba previsto para as 16:45h. Esta proba tamén é campionato galego desta mesma modalidade.
Xa o domingo á mañá desenvolverase a Copa España clásica individual con saída dende Éntoma ás 10h. e chegada ao Cachón. Xa ás doce darase paso ao Campionato de España de patrulla (equipos de tres padexeiros) na modalidade clásica, co mesmo percorrido. Ao mesmo tempo nesta fin de semana desenvolverase o campionato galego sprint e clásica.
No total destas probas está prevista a participación duns 15 clubs Cataluña, País Vasco, Castilla León, Asturias e Galicia, entre eles o Fluvial Barco, así como de arredor de 200 inscritos, unhas cifras similares ás doutras edicións.
Fotos: Carlos G. Hervella.
