Galerías de fotosOurenseÚltima hora

A Corporación ourensá pide a demisión do alcalde Gonzalo Pérez Jácome

Dos 26 concelleiros asistentes ao pleno, 24 apoiaban unha moción nese senso presentada polo BNG, pero que non era vinculante

Publicidade

 

Ás 9h. deste venres 11 de setembro o salón de plenos do Pazo provincial acollía un pleno extraordinario do Concello de Ourense, o primeiro que se celebra tras a suspensión do pacto de goberno entre Democracia Ourensana (DO) e o PP. A sesión principiaba coa presentación da renuncia como concelleiro de Mario González (DO), que será substituído por Telmo Manuel Ucha.

Despois a orde do día incluía, entre outros puntos, unha moción presentada polo BNG relativa á demisión do alcalde, Gonzalo Pérez Jácome, e que defendía no pleno Luis Seara. “Hai dúas semanas asistimos a un feito tan insólito como grave. Insólito, porque non é habitual que os compañeiros de partido do alcalde denuncien a este diante da fiscalía, e grave porque esta cuestión está a afectar á gobernabilidade do Concello, un Concello sumido na parálise dende hai 5 anos”, dicía o edil nacionalista, quen insistía en que “o prezo que está pagando a veciñanza polo pacto vergoñento”, que houbo entre PP e DO, é “elevadísimo”.

Nese senso a moción do BNG plantexaba que, “tendo en conta a situación de ingobernabilidade na que está sumido o Concello (…), o pleno exíselle a Gonzalo Pérez Jácome alcalde a demisión inmediata de todos os seus cargos”. Esta moción “non vinculante”, tal e como matizaba o propio rexedor, resultaba apoiada por 26 dos 24 edís asistentes ao pleno, votando unicamente en contra o rexedor e o concelleiro de DO Armando Ojea.

O voceiro do PP, Jesús Vázquez, aseguraba que “estamos ante unha situación grave e non podemos mirar para outro lado”, indicandolle a Jácome que “os ourensáns merecen que se lles explique que fai cos seus cartos cando hai unha sombra de dúbida”. O edil popular sinalaba que “Ourense necesita estabilidade, certezas, un rumbo claro e un goberno no que poida confiar”, polo que a situación “levounos a renunciar con inmensa dor ao goberno da cidade. Non podemos ofrecer lealdade cega cando non se é capaz de manter a confianza”.

 

O alcalde de Ourense, Gonzalo Pérez, nunha das súas intervención no pleno extraordinario do 11 de setembro./ Foto: Carlos G. Hervella.

 

Dende o partido socialista, Rafael Rodríguez Villarino, comentaba que “escoitando ao voceiro do PP parece que eles non tiveran nada que ver” e subliñaba que “esta cidade necesita un goberno serio” e que o momento actual é o resultado “dun experimento” no que a “vítima é Ourense, e lévao sendo moitos anos, e Jácome é un colaborador necesario que sacrificou a vontade dos votantes para cambiar esta provincia. O seu interese persoal fixo que pactara co PP que o utilizou”.

Ademais, dende Ciudadanos, José Araújo indicaba que Gonzalo Pérez Jácome “chegou a ser alcalde porque moitos concelleiros do PP lle votaron para que o fose” e que “non vai demitir, xa o dixo por activa e por pasiva”.

Pola súa banda, Pérez Jácome argumentaba que “non teño porque amosar nada” e pedía aos que o acusan que demostren eles esas acusacións. “Unha cousa é o partido e outra o diñeiro público e estáseme dicindo que faga unha rendición de contas ao PP, ¿pero acaso é un xuíz o PP? As contas de DO só lle competen ao Tribunal de Contas e á xente de DO. Isto é o colmo”, repetía en varias ocasións.

Intervencións semellantes escoitábanse novamente a partir das 13:45h., momento no que Ciudadanos presentaba unha moción relativa á “nefasta xestión do alcalde de Ourense”.

Nesta sesión plenaria aprobábanse tamén mocións como a relativa á posta en valor do Espazo Lusquiños da Mocidade e á referente á defensa do patriminio arbóreo de Ourense (presentadas polo partido socialista), entre outras.

Fotos: Carlos G. Hervella.

Artigos relacionados

Back to top button