Coa nova Estación Depuradora de Augas (EDAR) de Ourense corrixiranse os problemas estruturais e operativos que presenta a depuradora actual da cidade, en concreto, o elevado risco de sufrir inundacións e a súa falta de capacidade. Así o sinalaba a directora xeral da Auga do Ministerio de Agricultura, Alimentación e Medio Ambiente (Magrama), Liana Ardiles, na visita que realizaba na mañá do 11 de setembro ás obras desta instalación.
Nese senso, a nova EDAR de Ourense permitirá tratar as augas usadas por unha poboación de preto de 355.000 habitantes/equivalentes cumprindo as condicións de verquido que esixen as directivas europeas.”Terá capacidade para tratar un caudal medio de 72.192 metros cúbicos ao día, o triple da capacidade da actual planta. Unha auga que, unha vez tratada, devolverase ao Miño nas condicións axeitadas, o que contribuirá ao mantemento e conservación dos seus ecosistemas asociados”, segundo se informa dende o Magrama.
Este proxecto está promovido dende o Plan CRCE e conta cun orzamento de 59,3 millóns de euros, financiado polo Magrama (a través de Acuaes, con axudas do Fondo FEDER da Unión Europea), a Xunta e o Concello de Ourense. O remate da nova EDAR prevese para finais de ano e, de seguido, comezará un período de probas de tres meses que dará paso a un período de posta en marcha dun ano.
Nestes momentos, segundo informa o ministerio, tense executado o 100% das cimentacións e o 95% da obra civil dos grandes elementos “como os dixestores, o pozo de auga bruta, o tratamento primario e os reactores biolóxicos”.
Na súa visita ás obras, a directora xeral da Auga estivo acompañada polo delegado do Goberno en Galicia, Santiago Villanueva; e polo subdelegado do Goberno en Ourense, Roberto Castro, así como pola conselleira de Medio Ambiente, Ethel Vázquez, e polo alcalde de Ourense, Jesús Vázquez, entre outras autoridades.