OurenseÚltima hora

A II edición da ‘Xurés Bike Tour’ reunirá esta fin de semana a 200 participantes

A proba, organizada polo Inorde e apadriñada por Iván Raña, celebrarase do 10 ao 12 de xuño

Presentación do II ‘Xurés Bike Tour’ no Aquis Querquennis en Bande.

 

A segunda edición da ‘Xurés Bike Tour’ que organiza o Inorde co apoio de Turismo de Galicia, mesturará deporte con gastronomía ao coincidir esta proba coa celebración da 51 edición da Festa do Peixe de Bande, declarada de Interese Turístico de Galicia. “Este evento permitirá aos participantes descubrir os catro recursos cabeceira da nosa marca turística: patrimonio, natureza, enogastronomía e termalismo”, dixo o presidente do Inorde, Rosendo Fernández, na presentación da proba que tiña no Aquis Querquennis en Bande.

Á presentación tamén asistiu o delegado territorial da Xunta en Ourense, Gabriel Alén; a xerente do Inorde, Emma González; a alcaldesa de Bande, Sandra Quintas; o alcalde de Muíños; Plácido Álvarez; a alcaldesa de Lobios, Maria del Carmen Yáñez; o alcalde de Lobeira, Antonio Iglesias; o director técnico da proba, Serafín Martínez; e o director xerente de Caldaria, Javier Soto.

Esta proba,  ten como obxectivo “dinamizar turísticamente a nosa provincia, a través dunha das palabras fetiche que é o buque insignia da Deputación de Ourense: a cooperación entre institucións, pero tamén con entidades privadas, para poder facer realidade proxectos desta envergadura que contribúen ao desenvolvemento social e económico dos nosos territorios”, explicou Rosendo Fernández.

 

 

“O turismo deportivo é, desde hai anos, unha prioridade na folla de ruta do goberno provincial, porque somos conscientes do potencial que ten Ourense para acoller probas de diferente índole nos distintos concellos da nosa provincia. Somos o escenario perfecto e contamos coas infraestruturas idóneas para ser sede de eventos deportivos de primeiro nivel, como así o levamos demostrando nos últimos tempos”, salientou o presidente do Inorde.

Pola súa parte, o director técnico da proba explicou que “a proba comeza a facerse oco no calendario deportivo da provincia e estamos a ver como medra o número de participantes con respecto á primeira edición, tendo neste momento un total de 150 inscritos que disputarán a Xurés Bike Tour os tres días; e a máis de 50 persoas que o farán soamente en xornadas individuais. A maioría deles proceden, ademais das diferentes provincias galegas, fundamentalmente de Asturias, León e Portugal”, dixo Serafín Martínez.

Ademais, nesta segunda edición contarase cun padriño de excepción: o primeiro campión do mundo da historia do triatlón español, Iván Raña, que atesouro no seu palmarés numerosos galardóns que o converten nun referente a nivel mundial no ámbito deportivo.

 

 

Percorrido da proba

A ‘Xurés Bike Tour’, que permite a participación de xeito individual ou por parellas, desenvolverase en 3 etapas, do 10 ao 12 de xuño, perseguindo non só fins deportivos, senón tamén “que os deportistas alonguen a súa estadía e poidan gozar desta contorna ourensá e portuguesa que ofrece a zona do Xurés en grupo ou en familia”, sinalou Rosendo Fernández. Os participantes percorrerán diferentes lugares dos municipios de Muíños, Lobios, Montalegre, Entrimo, Lobeira e Bande.

O pistoletazo de saída será o venres, 10 de xuño, co prólogo que irá entre o Alto do Viso (Lobeira) e Bande, un percorrido de 17 km cronometrados con saídas cada minuto. Ao día seguinte, celebrarase a primeira etapa que terá a súa saída e chegada no complexo deportivo do Corgo en Muíños, e constará dun percorrido de 68 km. Nesta ocasión, os participantes terán a oportunidade de descubrir lugares espectaculares como Maus de Salas, Pitoes das Junias ou Tourem, do país veciño. A segunda etapa, que terá a súa saída e chegada no Balneario de Lobios, contará cunha distancia de 52 km e será a que decida o podio final.

 

Artigos relacionados

Back to top button