Boa novas para o deporte ourensán. Eva Feijoo Gómez, deportista xuvenil do club Salvour e nadadora do Club Natación Pavillón Ourense (CNPO) vén de ser convocada pola Federación Española de Salvamento e Socorrismo para participar nunha concentración en Serra Nevada, os días 17 ao 22 de decembro.
A iniciativa enmárcase no programa nacional de tecnificación deportiva promovido polo Consello Superior de Deportes e será “unha excelente oportunidade para adestrar durante uns días con outros deportistas de alto nivel e cos mellores técnicos do panorama nacional”, aseguran dende o Salvour, destacando que Eva é unha “excelente deportista que foi convocada ao devandito evento grazas aos méritos deportivos conseguidos en salvamento e socorrismo durante a tempada pasada, na que se proclamou campioa de España na categoría xuvenil”.
En Serra Nevada concentraranse 8 deportistas femininas e 8 masculinos, sendo seleccionados tan só 2 galegos. “Ademais de Eva tamén asistirá Gabriel Rodríguez Colferai do Club Salvamento e Socorrismo Carballo ( SYSCA)”, puntaliza o presidente do club Salvour José Manuel Paredes. Ali, os seleccionados realizarán análises cinéticos e biomecánicos; e traballarán na mellora das habilidades e destrezas específicas do salvamento e socorrismo dos deportistas desde os seus inicios, “favorecendo a táctica de equipo, fomentando a coordinación entre todos os deportistas asistentes á concentración e no desenvolvemento de forma global en todos aqueles aspectos que inflúen no rendemento dos socorristas”, conclúe Paredes.
