Na mañá deste martes 11 de outubro a Policía Local do Concello de Ourense iniciaba a campaña sancionadora para evitar o estacionamento indebido de vehículos particulares nos espazos reservados para paradas do servizo público de autobús urbano.
Así o anunciaba o concelleiro de Seguridade, Telmo Ucha, advertindo da “gravidade extrema” desta infracción. Por unha banda, os vehículos que ocupan as paradas dificultan a manobra dos autobuses, ocasionan incomodidades ás persoas que os utilizan e poden ocasionar riscos de seguridade se os autobuses ven no deber de parar distanciados das beirarrúas. Por outra, explica Ucha, os autobuses que teñen que parar nun carril, bloquean o tráfico, o que pode traer consecuencias de especial gravidade no caso de impedir o paso de vehículos de emerxencias.
Durante esta semana, axentes da Policía Local circularán nas liñas de autobuses urbanos para frear esta práctica irregular de estacionamento. Tal como explican dende o Concello, cando atopen vehículos aparcados nas paradas sen condutor, serán sancionados de inmediato e cando haxa vehículos parados con condutor requiriráselles para que abandonen a parada antes de que chegue o seguinte autobús.
Paralelamente, a Policía Local formará os inspectores da empresa de autobuses para indicarlles como denunciar estas infraccións.