Por terceiro día consecutivo, a provincia de Ourense rexistra un incremento nos casos activos de coronavirus e sitúase nos 600, o que supón 27 máis que onte, segundo os últimos datos publicados esta mañá pola Consellería de Sanidade e actualizados ás 18h. do 31 de decembro.
Dese total de positivos, 21 están hospitalizados en planta (1 menos que hai tres días) e 2 na Unidade de Coidados Intensivos (2 menos que hai tres días). Ademais soben lixeiramente os novos casos confirmados por PCR nas últimas 24 horas cun total de 52.
No que se refire aos ingresos, o Hospital Público de Valdeorras continúa con 1 hospitalizado en planta (o mesmo dato que na última semana), mentres o Hospital de Verín está libre de virus e o Hospital Universitario de Ourense rexistra 20 en planta (3 máis que hai tres días) e 2 na Unidade de Coidados Intensivos (2 menos que hai tres días).
O total de casos rexistrados ata o de agora na provincia ascende a 8.622, con 7.712 curados e 309 falecidos (o último era un home que falecía onte no Hospital Universitario de Ourense). Polo de agora lévanse realizado 136.517 probas PCR e 67.852 probas serolóxicas.
