Josefa Salgado Pérez naceu no Bolo, terra á que regresa sempre que pode, aínda que dende o 2010 reside en Madrid onde traballa no corpo de Xestión Procesal na Administración de Xustiza, e sempre tivo unha gran imaxinación, sendo unha apaixoada da lectura, en especial da literatura fantástica.
“Cando non podía durmir sempre imaxinaba que escribía pero nunha me poñía”, conta a propia Josefa que descobre a súa faceta de escritora case por un accidente inesperado, froito quizás dunha imaxinación desbordante nunha noite de insomnio, da que xurdiu a súa opera prima, “Abracadabra, Rubén” (Rimpompante, 2022), unha historia na que se mesturan a fantasía e a realidade. “No real está Rubén que fala de xogos como as canicas, os columpios ou o xadrez; e no fantástico está a meiguiña Xosefa que conta historias varias do seu mundo (dragóns, ogros,…)”, avanza a propia autora asegurando que o libro está dirixido ao público infantil “dende os 8 anos sen límite”.
Autoeditado en formato de peto, co deseño e correccións do Equipo Rimpompante e con fermosas ilustracións de Eva D. Romero Santarelli, o libro está á venda en Amazon e na Casa do Libro, así como nalgunha libraría de Valdeorras e era precisamente en casa, na I Feira Irmandiña do Bolo, onde o daba a coñecer aos seus veciños.
Máis información na edición de setembro do Periódico O Sil en papel.
Fotos: Carlos G. Hervella.