Mañá día 5 de abril arrincará a 12ª edición da campaña ‘Almorzos e Merendas Con Corazón’ que se celebrará ata o xoves 11 de abril nos 30 hipermercados e supermercados con que conta Alcampo en Galicia.
O obxectivo desta campaña de ámbito nacional, que foi presentada hoxe, é mellorar a alimentación de nenas e nenos que se atopan en situación de vulnerabilidade, ao mesmo tempo que promover entre eles unha alimentación sa e equilibrada que favoreza o seu desenvolvemento. Por iso, durante a próxima semana, os clientes de Alcampo poderán realizar doazóns de 1, 3, 5, 10 ou 20 euros nas caixas dos centros. Ao finalizar a campaña, a totalidade do importe recadado será entregado a Cruz Vermella en forma de tarxetas moedeiro que serán distribuídas entre familias con fillos en situación de vulnerabilidade para a adquisición de alimentos.
‘Almorzos e Merendas Con Corazón’ é unha iniciativa de Cruz Vermella, Alcampo, Nhood, Oney e a Asociación de Cociñeiros e Reposteiros (ACYRE Madrid). Ás doazóns realizadas polos clientes, Alcampo sumará unha doazón de 110.000 euros, e as empresas NHOOD e Oney achegarán 3.000 euros cada unha.
Nesta edición, a campaña desenvolverase en 432 tendas Alcampo repartidas pola xeografía nacional. Na pasada edición da campaña, celebrada en outubro de 2023, Alcampo, Cruz Vermella e o resto de empresas organizadoras lograron recadar 237.581 euros coa axuda de 2.725 persoas voluntarias. En Galicia lográronse recadar doazóns por valor de 16.956 euros.
En palabras de Ramón Jané, director de Inclusión Social de Cruz Vermella “grazas a esta campaña, na pasada edición contribuímos á mellora da alimentación de máis de 4.300 persoas. E é destacable tamén a mobilización de máis de 2.700 voluntarias e voluntarios que estiveron nos supermercados” sinala. Con campañas como ‘Almorzos e Merendas Con Corazón’ “desde Cruz Vermella buscamos concienciar e implicar tamén á sociedade para mellorar a calidade de vida dos nenos e nenas que viven en situacións de dificultade, contribuíndo á consecución do Obxectivo de Desenvolvemento Sostible número 2: poñer fin á fame, lograr a seguridade alimentaria e mellorar a nutrición”.
