Partía como favorito e non defraudaba. Na noite do sábado 24 de febreiro o valdeorrés Andi Canosa (Graíño Team O Barco) facíase co título MFC de MMA profesional tras vencer por KO no primeiro asalto ao catalán Diego Infante (Green Brothers de Reus).
O combate de MMA profesional -67kg pechaba a velada de loita en xaula que se celebraba no Hotel e Eventos Paladium, en Vilamartín de Valdeorras, da man do Mamba K1 Club de Ponferrada coa colaboración do Club Kickboxing Valdeorras á que asistía numeroso público entre eles o alcalde de Vilamartín, Enrique Álvarez.
Ademais de MMA, a velada incluía combates de K1, Muay Thai e Grappling, tanto amateur como profesional, masculinos e femininos, con loitadores chegados dende diferentes zonas de España e Portugal. Por parte do Graíño Team, ademais de Andi participaba Javier Carriba (Superfight de Grappling) e Felipe Morales (MMA amateur).
Máis información na vindeira edición de O SIL Deportivo.
Fotos e vídeos: Carlos G. Hervella.
