O SilFest Valdeorras é música, “pero tamén gastronomía e viño de Valdeorras, poesía, cinema, e natureza; unha mestura que fai deste festival a beiras do río Sil, no Barco (Ourense), unha experiencia única para todos os públicos”, aseguran dende a organización do festival que vén de presentar o cartel desta sétima edición que se celebrará do 13 ao 15 de xullo cun deseño da galega Alba Lameiro.
Un cartel formado por bandas como Anxo Stanich co seu Po de Battiato, Joe Crepúsculo que chega con Trobador Tecno ou Nena Polaca que subirá ao escenario con Asumirei a Morte de Mufasa. Repite, este 2023, no SilFest Valdeorras, Alberto & García, presentando o seu novo álbum A Ferida, e no apartado de artistas galegos destacan Fillas de Cassandra, Yoly Saa ou Luís Fercán. Xunto a eles, Joana Serrat, Whisky Caravan, The Gulps, Señora DJ e DJ Lagartija completan un cartel que aínda está pendente de confirmacións.
No Mini SilFest, para os pequenos da casa, o artista galego Pakolas fará parada a beiras do Sil co seu Rock and Roll para toda a familia.
As entradas para o SilFest Valdeorras poñeranse á venda o vindeiro venres 21 de abril ás 12h. a través da web do festival. O abono xeral (a partir de 12 anos) con acceso para os días 14 e 15 de xullo, terá un custo de 38 euros + gastos de xestión. O prezo da entrada con Carné Novo será de 28,50 euros + gastos de xestión. O abono para o Mini Silfest, os días 14 e 15 de xullo, será de 10 euros + gastos de xestión. Os menores de 3 anos entrarán ao recinto gratis.
