A previsión meteorolóxica era de fortes chuvias para este sábado 10 de febreiro día do desfile de Entroido en Vilamartín de Valdeoras. Por iso dende o Concello decidían cambiar o percorrido da comitiva e comezar na praza rumbo á Rodeleira para rematar no pavillón de O Bañadoiro cunha gran festa con animación musical, churros e chocolate.
Confiaban en que o tempo aguantase e estivo a punto pero xusto antes de empezar, comezaba a chover con forza. As comparsas participantes (unhas 15) de diferentes partes da comarca, aguantaban a chuvia e como recompensa, iniciado xa o desfile paraba de chover e escampaba ata saír o sol.
Un pouco deslucido ao principio pero coma sempre cheo de cor e fantasía, reivindicativo nalgúns casos, o desfile celebrábase con total normalidade a pesar do tempo.
Fotos e vídeos: Mónica G. Bellver.