Facer voluntariado “é unha forma de ser na vida. É saber que, grazas á túa solidariedade, a mellora e o cambio son posibles. É contribuír coa túa achega do xeito que máis se adapte ás túas circunstancias e á túa dispoñibilidade. Convértete nun axente de cambio social e fai voluntariado”. Así o destacan as voluntarias da Asociación Española contra o Cancro (AECC) en Valdeorras que neste 4 de novembro saían á rúa cunha mesa informativa no marco dunha campaña de voluntariado desta entidade na provincia.
Esta campaña consiste na presenza de mesas informativas na rúa, como a instalada no caso do Barco na praza do Concello, para informar sobre o que fai a asociación e os tipos de voluntariado e para darlle visibilidade a este labor solidario.
Os voluntarios centran a súa “enerxía en previr, sensibilizar, acompañar as persoas afectadas e financiar proxectos de investigación oncolóxica, o que permitirá un mellor diagnóstico e tratamento do cancro”, aseguran dende a AECC en Ourense.
Unha persoa pode facerse voluntario do seguinte xeito: no teléfono 988 219 300 / 900 100 036, no correo ourense@contraelcancer.es, ou na rúa Doutor Marañón, 21 – baixo (Ourense). Tamén a través das delegacións de O Barco de Valdeorras, Verín e Xinzo de Limia.
Fotos: A.R.
