Cita coa competición galega de piragüismo en Quiroga. Na mañá do vindeiro sábado 18 de setembro Augasmestas será escenario do Campionato galego de K2 nas categorías prebenxamín, benxamín e alevín. Comezará a partir das 11h. e está previsto que as saídas se dean cada 20 minutos.
Esta cita autonómica reunirá a uns 476 participantes de 26 clubs de diferentes partes de Galicia. “Xa tivemos en xullo a Gold River Race e con este evento buscamos potenciar o deporte fluvial no noso concello e aproveitar unha paraxe tan bonita e espectacular como é Augasmestas”, tal e como se destaca dende a Área de Deportes do Concello de Quiroga.
A proba será organizada polo Club de Piragüismo Cidade de Lugo e pola Federación Galega de Piragüismo en colaboración co Concello de Quiroga.
