Comezaron os traballo de arranxo da pista de acceso aos miradoiros turísticos de Vilañán (Quiroga). Trátase dunha pista duns 4 km que une o citado núcleo de pobocación co despegue de parapente e o miradoiro. “A Dirección Xeral de Turismo aporta 36.000 € para as intervencións que consisten en traballos de motoniveladora, realización de cunetas e pasos de auga e na colocación de grava compactada nalgúns tramos da pista”, segundo o Concello de Quiroga.
Ata a zona acudía o alcalde quirogués, Julio Álvarez, que se reunía alí co concelleiro de Deportes, Andrés Novoa, co técnico municipal e co encargado da empresa que realiza a obra. A visita comezaba na zona do miradoiro, onde xa se comezou a colocar e compactar a grava.
Nesta zona, considerada polos afeccionados a este deporte como unha das mellores polas súas térmicas, realizaranse labores de roza e fresado. Tamén está prevista e semente de especies herbáceas nunha zona duns 400 m2.
Ademais desta obra, estase a espera, como confirmou o alcalde Julio Álvarez, de que se comunique o inicio do arranxo do Miradoiro de Vilañán. A intervención no miradoiro complementará o traballo iniciado polos veciños deste núcleo.
Co acondicionamento da pista do despegue de parapente, do miradoiro de Vilañán e dunha rúa no núcleo dos Novais para o que se conta cunha achega do plan HURBE da Dirección Xeral de Urbanismo son máis de 120.000 € os que inviste o Concello de Quiroga de cara ao turismo do municipio e do Xeoparque Montañas do Courel.
Fotos cedidas.
