Viños europeos, pero tamén doutras latitudes como Arxentina, Sudáfrica, Australia ou os Estados Unidos poderán catarse e valorarse no decurso do curso de cata “Viños do mundo” que se impartirá os vindeiros días 11, 12, 13 e 14 de decembro (en horario de 18:30 a 21:30 h.) en Quiroga.
Esta acción formativa, de nivel II, será impartida polo experto Manuel Sánchez. Incluirá unha parte teórica e outra práctica tocando temáticas como a “percepción e interpretación sensorial, a linguaxe do viño”, “viños de España, virtudes e defectos”, “viños do vello mundo-Europa” ou “viños do novo mundo”.
Esta iniciativa, cunha duración total de 12 horas, será organizada pola xunta directiva da Confraría do Viño de Quiroga e terá lugar na Sala de Catas do Museo Etnográfico Municipal de Quiroga. O seu prezo será de de 60 euros e o prazo para anotarse estará aberto ata o sábado día 2 de decembro. As persoas interesadas deberán formalizar a súa inscrición na Casa de Cultura de Quiroga ou chamando ao teléfono 982435125.