Dende o Concello de Manzaneda estanse a realizar nestes días labores de desbroce das beiras das estradas que pasan polo municipio. Durante esta semana estase a traballar no vial que dá acceso á vila dende a denominada curva do espello.
“Aínda que esta estrada é de Iberdrola, nós temos asumido o seu mantemento, así como a da que sae de Raigada para o Bao”, explica o alcalde de Manzaneda, Amable Fernández.
Na vindeira semana prevese continuar coa limpeza dos 11 km de estrada da Deputación, “o tramo que empeza ao vir de Trives collendo dirección Manzaneda, e logo vai ata km e pico despois de Manzaneda. Son eses 8 km e os 3 km que van do pobo de Soutipedre que baixa ata a parte das Ermitas, onde empeza O Bolo”, continúa o rexedor, que explica o Concello ten un convenio coa Deputación neste tema.
