Un ano máis e fiel á cita, o Auditorio Municipal de Ourense acollía na mañá deste luns 6 de decembro. o acto institucional de conmemoración da Constitución Española, organizado pola Subdelegación do Goberno, no que se entregaron os premios aos 40 escolares de toda a provincia (entre eles dous alumnos do colexio Divina Pastora do Barco de Valdeorras), gañadores da 37º edición do Concurso da Constitución, polos seus debuxos e fotografías, centrados nos dereitos e deberes fundamentais recollidos no Título I da Carta Magna.
Concedéronse 20 premios na categoría de Educación Infantil, Primaria e Educación Especial, que recibiron un agasallo e un exemplar da Constitución Española; e 20 na categoría de ESO, Bacharelato e Ciclos Medios de Formación Profesional. Estes alumnos resultaron premiados cunha viaxe a Madrid para visitar o Congreso e o Senado.
No acto, o subdelegado do Goberno, Emilio González, sinalou que o alumnado é a “alma mater deste acto, interpretando con sensibilidade e acerto nos seus traballos os dereitos e deberes fundamentais dos españois”. Así mesmo agradeceu a implicación da comunidade educativa e dos patrocinadores no concurso, “porque comparten connosco a necesidade de amosarlle aos máis novos a riqueza e importancia dos preceptos que recolle a nosa Constitución”.
Fotos: Carlos G. Hervella
