Na tarde deste sábado 13 de xullo producíase un choque entre dous coches que deixa dous feridos, un deles atrapado, no concello ourensán de Coles, tal como indican dende o 112 Galicia, explicando que segundo a información facilitada por varios alertadores, “o sinistro produciuse pouco antes das tres desta tarde na N-525, en Gustei.
Ata alí acudían os medios e recursos para atender as dúas persoas que resultaron feridas e para liberar a unha delas, que estaba atrapada nun dos coches implicados. “Efectivamente, tratábase dun choque entre dous turismos, e como consecuencia do impacto, un dos ocupantes quedou atrapado”, confirman dende o 112, de aí que tivesen que intervir os membros do GES de Pereiro de Aguiar e os Bombeiros do Carballiño. “Unha vez liberado, foi evacuado, xunto co ocupante do outro turismo, ao centro hospitalario de referencia, sendo un equipo de Urxencias Sanitarias de Galicia-061 o encargado dos traslados”.
No operativo tamén colaboraron os voluntarios de Protección Civil e os axentes da Garda Civil.
