Algunhas das manifestacións máis senlleiras das festas de inverno da península daranse cita o vindeiro 23 de setembro no IX Festival da Máscara en Zamora. No programa deste evento destaca un desfile, previsto para as seis da tarde e que sairá do Parque da Mariña en dirección á praza de Viriato. Nel tomarán parte unhas 400 persoas de 24 festas de inverno, entre as que figuran tres Entroidos da provincia de Ourense: o Folión e os Boteiros de Viana do Bolo, os Peliqueiros e Parranfóns de Campobecerros (que acuden por vez primeira), e os Troteiros de Bande.
Destacarán asemade ata 12 mascaradas da provincia de Zamora, entre elas a Filandorra de Ferreras de Arriba, a Vaca Bayona de Almeida, os Carnavais de Villanueva de Valrojo, o Zangarrón de Montamarta ou as Visparras de San Martín de Castañeda e Vigo de Sanabria. Tamén se contará coa presenza de seis mascaradas portuguesas: os Caretos de Salsas, Ousilhão, Grijó de Parada, Parada e Aveleda.
Ademais do desfile, tamén están programadas actividades paralelas, algunhas delas para os máis pequenos. Así ese mesmo día na praza de Viriato haberá obradoiros infantís de elaboración de máscaras de 12h. a 13:30h. e despois, das 13:30h. ás 14:15h, o contacontos Los Explorabichejos. A partires das oito da tarde soará a música do grupo Carrión Folk, segundo se informa dende o Patronato Provincial de Turismo da Deputación de Zamora.