Todo un éxito de participación. Un cento de persoas, de diferentes idades, tomaban parte na xornada de portas abertas que o Club Arqueiros do Sil organizaba na tarde deste 26 de agosto no campo de tiro do Aguillón (A Rúa). Con ela pretendían dar a coñecer este deporte e tamén o labor e traxectoria deste club valdeorrés.
A actividade desenvolvíase entre as 19 e as 21h. Nela os participantes, acompañados por un monitor, tiñan a posibilidade de coller un arco e probar a tirar con el. Tamén se realizaba unha exhibición. Esta é a primeira vez que o club promove unha iniciativa deste tipo e están moi satisfeitos co resultado. Tanto que xa están pensando en repetir a xornada o vindeiro ano en sala e tamén no verán.
“Polo de agora imos preparar cursos de iniciación ao tiro con arco porque houbo moitas persoas que probaron, ás que lles gustou e que nos transmitiron o seu interese por entrar no deporte e quedarse no club”, adianta a presidenta dos Arqueiros do Sil, Cristina Delgado.
Fotos e vídeo: Carlos G. Hervella.
