Na mañá deste venres 13 de maio falecía, aos 99 anos de idade, Ricardo Rodríguez Rivas, ex cabo xefe da Policía Local do Barco de Valdeorras.
Viúvo de Amalia Álvarez Prada e pai dúas fillas (Ramona e Amalia) Ricardo nacía en Cuba pero viviu praticamente toda a súa vida na vila natal da súa nai, O Barco de Valdeorras, estando máis de corenta anos no corpo da Policía Local. Tal como explica a súa filla Amalia, Ricardo, popularmente coñecido como ‘Tarira’ entrou sendo un neno no Concello do Barco como mozo dos recados, despois marchaba facer o Servizo Militar e ao seu regreso ao Barco volvía ao Concello entrando xa no corpo dos municipais, onde se xubilaba como cabo aos 65 anos.
“Viviu nunha época moi diferente á actual, O Barco non era como agora nin tampouco a Policía Local. Meu pai era o encargado do cárcere que había nas Casas Baratas e cando detiñan alguén ía a Garda Civil a buscalo a casa para que abrira a cela, sendo el o responsable do preso ata que dispuxera o xuíz. Daquelas era o que facían, controlar o tráfico, catro papeis e pouco máis”, conta Amalia.
A nivel persoal, a Ricardo gustáballe moito saír cos amigos (era membro da Peña de San Francisco Blanco) e ler o periódico pero sobre todo estar cos netos que o consideraban un referente. “Criounos a todos, era moi familiar”, di Amalia. Tamén era moi devoto do Nazareno (era confrade), devoción que compartía con toda a familia. “É unha tradición que sempre mantivemos”, di a súa filla recoñecendo que sempre tivo moi boa saúde.
A capela ardente está na Sala 2 do Tanatorio Santa Rita, no Barco, e o funeral será mañá, sábado 14 de maio, ás 15:30 horas na Igrexa de San Mauro, seguido do sepelio no cemiterio municipal.
