“Alta e reñida”. Así prevía o xuíz nacional de tiro con arco, Jorge Mato, a final do X Trofeo Arcobarco e acertou de pleno. Por un axustado 148-146, o italiano Federico Pagnoni vencía ao español Alberto Blázquez (seis veces campión de España) na final de arco composto sénior masculino, do torneo celebrado o 24 de outubro no pavillón barquense de Calabagueiros.
En arco composto feminino, a española María Gómez impoñíase á italiana Anastasia Anastasio por 143-139. Na categoría de arco recurvo, o portugués Jorge Alves gañaba na final ao galego Vicente Veira, e Noelia Pena a Marta Guerrero.
Este foi sen dúbida o Trofeo Arcobarco máis internacional, coa participación de 96 arqueiros de diferentes puntos de España, Italia, Suíza, Bélxica, Finlandia e Portugal, unhas prazas que se cubrían apenas dezaseis horas despois de abrir as inscricións, quedando fóra máis de 50.
Máis información na vindeira edición en papel do Periódico O Sil.
