O Museo Municipal de Ourense, na rúa Lepanto, albergará até o 11 de febreiro a nova proposta fotográfica de Laia Abril. “Lobismuller”, que aborda a identidade de xénero a través do caso Romasanta, de Allariz, poderase visitar na sala de fondos do Museo no marco do Outono Fotográfico.
Coñecido como Manuel Blanco Romasanta, mais bautizada como Manuela, xa que inicialmente se identificara como muller. De acordo coas actuais teorías médicas era unha persoa intersexual. “Lobismuller” reconstrúe desde unha perspectiva feminina a historia da asasina en serie máis enigmática e criminosa da historia galega. Como sabemos, Romasanta era coñecida como Sacaúntos, debido á lenda de converter a graxa das súas vítimas en xabón de alta calidade; durante o xuízo de 1853, foi acusada de 9 dos 12 asasinatos que admitiu (de 17 atribucións), afirmando que non era culpábel xa que sufría unha maldición que a convertía en lobo.
Laia Abril é unha artista multidisciplinar que traballa con fotografía, texto, vídeo e son. Despois de graduarse en Xornalismo, mudouse a Nova York para asistir a cursos de fotografía do ICP, onde decidiu encamiñar os seus proxectos en contar historias íntimas que expoñen realidades incómodas e ocultas relacionadas coa sexualidade, os trastornos alimenticios e a igualdade de xénero. En 2009 e durante 5 anos traballou en “Fabrica”, a residencia artística do Centro de Investigación Benetton en Italia; onde traballou na revista “Colors” como editora creativo e fotógrafa. Alí comezou un equipo de creación de libros co Director de Arte Ramón Peixe.
