Dende o 7 de decembro de 2019 e ata o 7 de xaneiro de 2020 a Sala de Exposicións de Viana do Bolo (ao lado do Concello) acolle a mostra de moda de Jorge De Álvarez. Unha exposición cos deseños das dúas últimas coleccións premiadas deste xove modisto vianés: Royalty e Metamorfosis.
A primeira, Royalty, está inspirada nas realezas española e francesa, e formada por catro deseños realizados en teas brocadas e encaixe de Camariñas dourados. “Son deseños sen xénero que demostran que calquera persoa pode ser unha raíña”, di Jorge, que valeron o Primeiro Premio na Mostra do Encaixe de Camariñas 2018. A segunda, Metamorfosis, está inspirada nos anos 30, nas festas clandestinas nas que os homosexuais se travestían para poder ser eles mesmos. A pedrería e as plumas son a esencia desta colección que resultou gañadora do premio DS Midnigth Fashion de Mondariz 2019.
En total son 30 os deseños que forman parte da mostra coa que Jorge Álvarez pretende demostrar que “no rural tamén se pode”. A inauguración tiña lugar na tarde de onte, coa asistencia de numeroso público e malia estar acostumado ás pasarelas, Jorge recoñecía estar nervioso xa que facer unha exposición era un dos seus soños e por fin facíase realidade. “E en casa o que todavía me alegra máis”, di, agradecido a todos os que o fixeron posible e colaboraron con el. Dende os veciños e asistentes ao acto, ata o Concello que lle cedeu o local, sen esquecer á familia e aos amigos máis achegados.
De feito a exposición está adicada a dúas persoas moi especiais para el: a súa avoa Lugardita, que sempre o apoio e falecía hai uns meses; e Estela Barone unha boa amiga que, entre outras cousas, se ocupa da parte fotográfica dos eventos nos que se embarca. Ela foi a encargada de cortar a cinta que daba acceso á exposición en torno ás oito da tarde deste sábado 7 de decembro, dando paso a un emotivo discurso do propio Jorge no que explicou os motivos que o levaron a organizar o evento. Nos desfiles, a xente non é consciente do traballo que hai detrás de cada deseño. Os bocetos, os patróns, a costura,… Horas de traballo e noites sen durmir para chegar á prenda final que se ve sobre a pasarela. “Iso é o que quero que a xente vexa, o proceso completo, dende a idea orixinal e o debuxo ata a prenda rematada. Que a xente poida ver as prendas de cerca e aprezar os detalles”, explica o propio Jorge.
Na inauguración, ademais dos deseños en perchas e tamén maniquíes, fotografías e mesmo patróns, tamén houbo catro modelos de carne e oso que luciron algúns dos deseños de festa de Jorge De Álvarez.
A exposición pode verse en horario de mañá e tamén abrirá as portas nalgunha data especial neste Nadal.
Fotos: Estela Barone.