O novo pleno do Consello Regulador da D.O. Valdeorras, resultante das eleccións celebradas o 9 de xullo, constituíase na mañá do 28 de xullo na sede deste órgano réctor en Vilamartín. A sesión constitutiva, presidida por Iago Borrajo, xefe territorial da Consellería do Medio Rural en Ourense, comezaba coa presentación das credenciais por parte dos vogais electos, un total de nove.
De seguido procedíase ás votacións para nomear presidente, na que resultaba elixido por cinco votos a favor José Luis García Pando, quen xa ocupara a presidencia deste organismo entre os anos 2006 e 2015.
De seguido decidíanse as vicepresidencias. Así será Marcos Prada Ginzo, vogal do sector industrial e representante de Adega Melillas e Fillos S.L. vicepresidente primeiro; Antonio García Fernández, vogal do sector produtor, vicepresidente segundo; e Manuel Fernández Pérez, vogal do sector cooperativo como vicepresidente terceiro.
