O programa comezaba onte co campionato de petanca, baile co trío Nostalgias e unha festa de dj’s no bar da festa, pero é hoxe, venres 8 de setembro, cando Larouco vive o día grande das festas patronais na honra á Virxe dos Remedios. O acto central era a procesión coa imaxe da Virxe que saía da igrexa parroquial ás 13h. percorrendo boa parte da vila acompañada polo grupo de gaitas de Abertal e numerosos devotos. De volta na igrexa tiña lugar a eucaristía cantada polo coro da parroquia de Santo Estevo, na Rúa.
Á saída da misa, veciños e visitantes desfrutaban da sesión vermú nos bares do pobo e pola tarde o baile correrá a cargo da orquestra Salsanera que actuará en sesión de tarde e verbena, rematando xa de madrugada ao son da disco móbil Chocolate.
Lonxe de rematar a festa continuará mañá, sábado día 9 de setembro. Ás 16 horas haberá campionato de tute e a partir das cinco, tarde de xogos infantís. E xa pola noite, a partir das nove haberá unha pancetada popular con sorteo de rifas, e baile en sesión de tarde e verbena con Disco Stuu.
Fotos e vídeo: Carlos G. Hervella.