A Praza Maior de Ourense encheuse de xente na tarde de hoxe, 8 de abril, para poder gozar do sorteo da Lotería Nacional en favor da Cruz Vermella. Baixo un sol de xustiza, os curiosos e as personalidades políticas e sociais da cidade acudiron para ver como se repartía a sorte para toda España dende a cidade das Burgas.
Un amplo despregamento de medios fixeron posible que todo o Estado estivese pendente deste sorteo que cada ano se fai nunha localidade diferente. O acto abriu e pechouse coa música da Real Banda de Gaitas da Deputación.
Os encargados de distribuír esa sorte foron os rapaces e rapazas de San Idelfonso acompañados polos rapaces que participan no programa de Cruz Vermella Xoven de Ourense. O sorteo arrancou puntual, cara ás 13:00 horas. As bolas foron metidas dos bombos e comezou a incertidume.
O primeiro en saír foi o terceiro premio, dotado dunha cantidade de 50.000 euros. O número agraciado foi o 70.835, que foi parar para a localidade navarra de Tudela. O segundo premio, de 250.000 euros, recaeu sobre o número 00769. Entre as localidades agraciadas está Carballo (A Coruña). A pesar de que todo o mundo tiña a esperanza de que o primeiro premio recaese sobre Ourense, finalmente o millón de euros foi a parar para as provincias de Albacete e Málaga. O número agraciado foi o 15.369.
Por outra banda, tamén se fixo un sorteo de 4.000 euros de donativo para unha organización ou asociación sen ánimo de lucro de Ourense. Devandito donativo foi para a asociación Morea.
Texto e fotos: Carlos Asensio.
