A localidade ourensá de Luíntra, no municipio de Nogueira de Ramuín, acollía na noite do sábado 3 de agosto o festival de microcine de verán “Un pobo de cinema”, organizado pola plataforma para loitar contra o despoboamento ‘Vente a Vivir a un Pueblo’ e Iberdrola.
Esta iniciativa busca “poñer en valor a calidade de vida dos pequenos pobos do noso país, fronte aos grandes macroeventos organizados noutros lugares”, din dende Iberdrola, explicando que no festival exhíbese unha selección de producións audiovisuais de microcine, de menos dun minuto de duración cada unha, que foron premiadas en diversos concursos sobre sustentabilidade organizados por Cultura Inquieta.
Trátase da segunda edición do festival, grazas á gran acollida que tivo o pasado ano e o acto tiña lugar na praza consistorial de Luíntra onde se daban cita máis de 200 persoas entre veciños e veraneantes da zona, que foron convidados a flocos de millo e refrescos, como corresponde a unha boa sesión de cinema.
De maneira previa á proxección, houbo unha pequena presentación dirixida polo xornalista e creador de ‘Vente a Vivir a un Pueblo’, Ramón Pradera, quen puxo de manifesto que “os pobos teñen un potencial enorme para que, quen queira instalarse neles, poida desenvolver un proxecto persoal e profesional con garantías de éxito. Xa abonda de falar da España baleirada; é o momento de falar da España das posibilidades. Este festival é unha festa para reivindicar a calidade de vida do mundo rural”.
A iniciativa percorre distintas localidades da xeografía española co fin de impulsar a oferta cultural no mundo rural, con proxeccións en Torrecillas de la Tiesa, Valcarlos (Navarra), Valle de Tobalina (Burgos), Campoo de Yuso (Cantabria), e Nogueira de Ramuín (Galicia). Pola súa banda, Iberdrola colabora nesta acción cultural dada a súa vinculación histórica ao mundo rural, onde ten as súas raíces e onde na actualidade desenvolve importantes proxectos de enerxía renovable que impulsan o crecemento e o emprego, contribuíndo a evitar o despoboamento.
Ourense, referente enerxético
Na contorna de Luintra atópase a central hidroeléctrica de Santo Estevo. Propiedade de Iberdrola, sitúase na conca do río Sil. Tras a culminación da planta de Santo Estevo II, a central converteuse no maior complexo hidroeléctrico de Galicia cunha capacidade total instalada de 451 MW. Ademais, é pioneira na rexión por producir enerxía hidráulica equivalente ao consumo medio anual de máis de 600.000 persoas, case o dobre da poboación da provincia de Ourense.
A localización privilexiada en que se atopa o encoro outórgalle un gran potencial en canto a recursos naturais. Debido á alta media de precipitacións na rexión, unha das máis húmidas do país, o complexo de San Esteban aproveita da mellor maneira a auga da choiva para xerar enerxía limpa e renovable. Ademais, Ourense é a provincia galega onde Iberdrola España opera cun maior número de parques eólicos: Nogueira (3 MW), Vieiro (20 MW), Pena da Cruz (23 MW), Serra do Burgo (27 MW), Sil (49 MW), Sil Ampliación (40 MW) e Serra do Larouco (42 MW). A potencia de todas as instalacións suma un total de 204 MW de capacidade.
“A convivencia entre cultivos, pastos, parques eólicos, plantas fotovoltaicas ou encoros é posible”, aseguran dende Iberdrola que leva anos traballando en distintas iniciativas que “favorecen a coexistencia coas renovables e contribúen ao desenvolvemento socioeconómico e a conservación da biodiversidade”.
