Unanimidade no consello de administración de Meisa (Manzaneda Estación de Inverno S.A.) celebrado na mañá do 22 de decembro nestas instalacións en Cabeza de Manzaneda. Saía adiante a proposta de axilizar e aprobar os pregos para a contratación do sistema de innivación, que garantirá, aló menos, 120 días anuais de neve na estación de montaña, unha infraestrutura que será realidade no ano 2017. Asemade designábase a mesa de contratación que valorará as distintas ofertas ao mesmo.
Durante a vindeira semana publicarase as bases do concurso na web de la estación www.manzaneda.com e na prensa, establecéndose o 17 de febreiro como data límite para a recepción das ofertas, segundo se informa dende a estación. A entrega poderá realizarse nas oficinas deste complexo, así como no rexistro xeral da Deputación de Ourense.
Esta actuación suporá un investimento de 5.107.838,75€ máis IVE, e acometerase na súa totalidade no próximo ano, para que poda estar lista e en funcionamento na vindeira tempada. Para o presidente da Deputación de Ourense, Manuel Baltar, isto significa “unha aposta non só dos concellos de Manzaneda e Trives, non só de Ourense, senón tamén unha aposta de Galicia”. E incidía en que este centro turístico e deportivo “ten un destacado atractivo para visitantes de Galicia, doutras comunidades e tamén do norte de Portugal”.