Seis anos despois da XII edición do Trofeo ArcoBarco de Sala, a competición regresa ao Barco nesta fin de semana co Campionato Galego de Tiro con Arco en todas as categorías, ata un total de 40, entre infantís e adultas.
A competición arrincaba na mañá sábado 16 de decembro no pavillón de Calabagueiros coas competicións das categorías base (prebenxamín, benxamín, alevín e infantil) e as modalidades long bow e tradicional. Pola mañá celebrábase as series de 30 flechas e pola tarde serán as eliminatorias ata a final.
Mañá será o turno das modalidades estrela, recurvo e composto, para as categorías cadete, júnior, absoluta e veterana, co mesmo sistema, rondas clasificatorias (dúas series de 30 flechas cada unha) pola mañá e eliminatorias pola tarde ata chegar á final cos bronces e ouros.
Dende o club adiantan que a competición reúne a máis de 200 arqueiros entre os que estará o galego olímpico Miguel Alvariño (imaxe do cartel promocional) entre outros campións de Europa en long bow.
Fotos: Mónica G. Bellver.
