Ás veces as cousas e lugares que temos máis cerca son os grandes decoñecidos, por iso, tralo éxito da ruta celebrada no mes de febreiro, dende As Letras de Florencio, co apoio da Consellería de Cultura, Educación e Universidade, organizaron outro percorrido educativo pola aldea natal de Florencio dirixido nesta ocasión aos centros educativos da comarca de Valdeorras que tamén estará guiado por Débora Álvarez Moldes, directora do proxecto As Letras de Florencio, e Fernando Santalla, veciño de Córgomo e parente do poeta.
As visitas xirarán en torno aos lugares da aldea que tantas saudades poéticas lle inspiraron, comezando na Portela ou Baxeles, aldeas veciñas nas que Florencio tiña bos amigos e que visitaba con frecuencia. A ruta deterase en puntos da súa biografía, como a casa natal e mais a do Poulo, onde viviu de mozo, e tamén noutros mencionados nos seus poemas como a igrexa da Santa Marta ou a Aira dos Bolos.
De momento está programada a visita de catro centros educativos, o que suma máis de douscentos alumnos de Primaria e Secundaria. Este mércores 11 de maio, irán os nenos do Colexio Plurilingüe Divina Pastora do Barco de Valdeorras (saída ás 9:30h. dende A Portela); o venres 13 de maio os do CEIP Xosé Manuel Folla Respino de Vilamartín de Valdeorras (saída ás 10h. dende Baxeles). O luns 16 de maio os do CEIP Condesa de Fenosa do Barco de Valdeorras (saída ás 10h. dende Baxeles; e o venres 20 de maio os do CPI Tomás Terrón Mendaña, de Sobradelo (saída ás 10h. dende Baxeles).
