Trala tarde de obradoiros, pintacaras e fotomatón, chegaba a quenda do humor no programa de actividades do Samaín OBarcoaberto. Así, pasadas as 19:30 horas deste venres 27 de outubro, a carpa instalada na praza do Concello do Barco convertíase nun teatro no que cativos e maiores desfrutaron do divertido e terrorífico espectáculo “Abracadaver” do Circo do Terror.
Diante dun animado público o protagonista comezaba a actuación explicando entre música e xogos, a historia de como coñecera ao seu compañeiro, Vladimir, oculto nun féretro sobre o escenario. A partir de aí, fixo de todo co firme propósito de divertir, entreter e “asustar” aos cativos, dende divertidas e mesmo ridículas coreografías ata malabares.
Mañá haberá máis actividades pola mañá na carpa da praza do Concello e pola tarde o túnel do terror no pavillón vello.
Fotos e vídeos: Mónica G. Bellver.
