Despois de catro días de intensa actividade, Megaxove pechaba as portas da súa 17ª edición con máis de 9.000 visitas. Xoves e familias de toda a comunidade e do norte de Portugal achegáronse ao longo da semana ata Expourense para participar activamente nas máis de 150 opcións deportivas, culturais e de lecer que ofrecían os 30 expositores no Salón da Xuventude.
A última xornada do Salón, o xoves 8 de decembro, estivo marcada pola celebración de distintos campionatos deportivos que convocaron no recinto feiral a máis de 1.000 deportistas de diferentes edades que participaron nos torneos de xadrez, fútbol sala, kick boxing, judo, halterofilia e minibasket.
O salón da Xuventude ofreceu a posibilidade de practicar actividades xa coñecidas polos visitantes, pero serviu tamén para dar a coñecer outras vencelladas ao tempo libre, á cultura e ás disciplinas deportivas minoritarias, asi como todo aquelo que animara á participación activa e á adopción de hábitos saudables. Cada rapaz e rapaza puido escoller libremente en qué quería invertir o seu tempo de lecer: dende xogos populares e tradicionais ata a zona de videoxogos, ata deportes populares coma o fútbol sala ou xadrez e outros menos coñecidos como a esgrima antiga ou a loita.
Unha das novidades desta edición foi a área denominada “Pulpo Extreme” coordinada pola Concellería de Xuventude de Ourense que chamou a atención dos adolescentes que se animaron a practicar roller, BMX e skate. Só durante a última tarde participaron máis de 200 rapaces nos obradoiros programados sobre estas actividades.