Moreyra pecha a súa estadía en Ourense cunha conferencia sobre cerámica aborixe

Na tarde do 7 de outubro inaugurarase en Vilamartín o mural realizado no obradoiro impartido por este mestre escultor arxentino

Conclúe o intercambio cultural arxentino-ourensán que nas últimas semanas realizaba o recoñecido mestre escultor arxentino Carlos Moreyra na provincia de Ourense. Era un periplo que este creador, acompañado polo profesor Leonardo Corazza e pola artista Laura Duben (tamén arxentinos), encetaba o 14 de setembro no Barco co espectáculo “El Barro y yo”.

Días despois, impartía un obradoiro de muralismo en Vilamartín no que se realizaba un mural que será inaugurado na tarde do 7 de outubro no Bañadoiro ás 20:30h., un acto no que ademais os asistentes poderán bautizar esta singular obra, que rende tributo á cultura do viño valdeorresa.

Despois, xa na cidade de Ourense, reuníase co seu alcalde, Xesús Vázquez, levaba tamén ao escenario do Liceo o espectáculo “El Barro y yo” e impartía un novo obradoiro de muralismo, desta volta no Claustro do Convento de San Francisco. Froito desta actividade xurdía un novo mural, cuxa temática xiraba en torno a este santo.

E xa na tarde do 6 de outubro daba unha conferencia no Centro Cultural Ángel Valente na que explicaba o armado e orixe dos fornos aborixes de distintas comunidades do continente americano. Asemade abordaba as actividades desenvolvidas nestes días na provincia.

Este intercambio cultural internacional ten sido promovido pola Asociación de Artesáns de Ourense en colaboración con Laurarte. Centro Artístico da Pedra.