Esta tarde o presidente do Colexio Oficial de Farmacéuticos de Ourense (COFO), Santiago Leis Vence, un chamamento á tranquilidade dos habitantes da comarca de Trives asegurando que non haberá cambios nas gardas das farmacias na zona a partir de xaneiro. Con todo, admitiu como gravosa a situación que atravesa a farmacia de Castro Caldelas, que está de garda permanente, e destacou que á “Xunta de Goberno do COFO gustaríalle buscar, en consenso cos alcaldes da zona e as forzas vivas da comarca, unha solución para aliviar a carga de traballo que soporta”.
Santiago Leis Vence expuxo que existe un Decreto da Consellería de Sanidade que faculta aos colexios farmacéuticos a reorganizar as quendas de garda en contornas semiurbanos e rurais, en función das súas singularidades sociodemográficas, de poboación e tendo en conta as comunicacións existentes e a distancia ao PAC de referencia, que xa se aplica noutras provincias galegas. “Desde o COFO quérese poñer en valor que a aplicación deste Decreto realízase sempre con criterios técnicos e que busca conxugar que se garanta a prestación farmacéutica a a cidadanía e as necesidades e demandas que lles trasladan os seus colexiados”, dicía.
Leis Vence puxo de manifesto que existen farmacias rurais ourensás que atravesan dificultades, que poñen en xaque a súa viabilidade, e que custa moito incorporar profesionais farmacéuticos ás boticas en moitos núcleos da provincia. Neste sentido, reclamou que as administracións e os axentes políticos, sociais e económicos de Ourense aúnen esforzos para xerar un rural máis atractivo para vivir.
“O acceso á prestación farmacéutica estará sempre garantido en toda a provincia e estamos abertos a futuras melloras para mellorar a súa prestación”, sinalaba Leis Vence. O presidente do COFO entende a preocupación que se puido xerar, pero en ningún momento a medida proposta “pretendía prexudicar a a cidadanía”. Neste sentido, lembrou que a Farmacia foi declarada servizo esencial durante a pandemia e nos peores momentos do confinamento permaneceu aberta e accesible para todos os usuarios.
En canto á situación do Ribeiro, cuxa proposta consultiva para estender as quendas de garda ás farmacias periféricas (que comparten PAC de referencia con Ribadavia), foi exposta telefonicamente a todos os titulares das farmacias ás que afectaría a medida, o presidente do Colexio destacou tamén que non se aplicarán as medidas suxeridas ao non existir consenso. De feito, na propia acta da Xunta de Goberno do COFO na que se acordaba a proposta consultiva detallouse especificamente que non se aplicaría se non existía acordo.
Finalmente, Leis Vence reiterou a sensibilidade do Colexio coas demandas cidadás e expuxo o seu desexo de poder, nun futuro próximo, facer compatible o traballo e servizo que se ofrece á poboación sen menoscabar “o traballo dos nosos compañeiros”.
