A Consellería de Sanidade vén de confirmar un brote de coronavirus en Trives, con catro positivos, despois do diagnóstico dun gromo familiar e importado de Covid19, en dous homes de 70 e 42 anos, unha muller de 33 anos de idade e un neno, todos eles residentes nese concello ourensán.
“Desde o primeiro momento o centro de detección de contactos activou o protocolo para o seguimento e estudo dos seus contactos máis estreitos coa identificación e posterior realización das probas diagnósticas correspondentes”, indica Sanidade.
Neste momento os catro pacientes están en situación de illamento domiciliario controlados e monitorizados telemáticamente en todo momento e a seguimento polo persoal sanitario do seu centro de saúde.
A aparición deste gromo levou a que Sanidade, como medida preventiva, ordease desde hoxe a restrición total nas visitas e nas entradas e as saídas da residencia da terceira idade de Trives co obxectivo de “preservar a saúde e seguridade dos residentes e dos traballadores do centro”.
Dous novos casos no brote de Vilamarín
Ademais na mañá deste 22 de agosto engadíanse dous novos casos ao brote que tivo o seu inicio no concello de Vilamarín o pasado mércores 19 de agosto. “Neste momento son trece os pacientes deste gromo que están en situación de illamento domiciliario controlados e monitorizados en todo momento pola plataforma Telea e a seguimento polo persoal sanitario dos seus respectivos centros de saúde”, tal e como informa o Sergas.
Ante a aparición deste brote Sanidade ordeaba dende o pasado mércores, como medida preventiva, a restrición total nas visitas e nas entradas e as saídas da Residencia sociosanitaria Santiago Apostol de Villamarín e onte a da Residencia La Saleta de San Cristovo de Cea.
