DeportesÚltima horaVídeos

Novo podio para o rider rues Javier Fernández, desta volta no DHI Manzaneda Bike Park

Javier Fernández (1º pola dereita) co trofeo.

 

O rider rues Javier Fernández Quiroga segue sumado podios e trofeos ao seu palmarés. Desta subía ao terceiro chanzo no II Trofeo Federación DHI Manzaneda Bike Park celebrado a pasada fin de semana na Estación de Montaña Manzaneda, a proba que abría o calendario da Copa Galicia de Descenso.

Tal como explican dende a federación galega de ciclismo, as condicións atmosféricas acompañaron cun soleado día, “nada que ver co acontecido o pasado mes de novembro na primeira edición do evento organizado conxuntamente pola Federación Ciclismo Galego (FCG) e a Estación de Montaña de Manzaneda”, di, incidindo en que “grazas ao traballo técnico do staff do Manzaneda Bike Park, as corredoras e os corredores puideron desfrutar, e ao mesmo tempo padecer, o circuíto Cabra Calavera”.

O percorrido no que se celebraron as quendas clasificatoria e final presenta un importante compoñente físico. “Pedalexar é obrigatorio tanto no treito inicial como no final, unha esixencia superior á da maioría de probas de DH e que provocou que unha parte dos riders chegaran sen folgos á liña de meta”, din dende A FCG.

 

O orixinal trofeo conseguido por Javier en Manzaneda.

 

E entre os preto de 130 riders participantes, o rues Fernández Quiroga (Bicicletas Chinquena) era terceiro na categoría elite cun tempo de 03:18.207.

A cerimonia de podio contou coa presenza de Víctor Picos, director da Estación de Montaña; Miguel Sierra, tenente alcalde do Concello da Pobra de Trives; Clemente Pérez, responsable da Agrupación de Protección Civil de Manzaneda; e José Antonio Guerra e Juan González, voluntarios de Protección Civil de Manzaneda.

O certame autonómico volverá a escena o 5 de xuño no Páramo co VI Descenso DhgTeam e a seguinte cita co DHI en Manzaneda chegará o 10 de xullo no Campionato de Galicia. Antes, esta mesma fin de semana Javier irá ata preto de Chaves, para correr na 4ª Taça de Portugal de DHI en Boticas.

 

Artigos relacionados

Back to top button