Na reunión da Xunta Local de Seguridade do Barco celebrada este 9 de marzo (baixo a presidencia do alcade do Barco, Alfredo García, e do subdelegado do Goberno en Ourense, Emlio González) acordábase renovar o Convenio de Seguimento Integral dos casos de Violencia de Xénero, que será asinado polo Concello co Ministerio de Interior para regular a presenza da Policía Local no sistema Viogen. O Concello de O Barco xa participa dende o ano 2011 no sistema operativo Viogen, aínda que dende 2006 vén traballando en colaboración co Goberno central na erradicación da violencia de xénero.
A través do sistema Viogen a Policía Local dispón de maior información sobre todos os casos activos de violencia machista, de tal maneira que os propios policías locais pasan a asumir o seguimento e control dalgúns destes casos, considerados de nivel de risco baixo ou de risco non apreciado, mentres que a Garda Civil se encarga do seguimento do resto de casos. O número de casos activos asignados á Policía Local será como máximo do 50% do total dos existentes no Concello, non superando a cifra de vinte vítimas.
Na actualidade en O Barco hai activos no sistema VioGen 18 casos deste tipo, dos cales dous presentan risco medio, catro presentan risco baixo e doce presentan risco non apreciado, segundo informa a Subdelegación. En canto ás medidas xudiciais todos os casos contan con medidas de prohibición de aproximación e comunicación.
Por outra banda, os representantes das Forzas e Corpos de Seguridade do Estado informaron da evolución relativa á seguridade cidadá do concello, na que se constatou un lixeiro incremento dos delitos leves contra o patrimonio, debido fundamentalmente ao incremento das estafas realizadas a través de Internet e das novas tecnoloxías.
Emilio González trasladou aos representantes das Forzas e Corpos de Seguridade presentes na reunión o seu agradecemento polo traballo e polo esforzo desenvolvido, incidindo na importancia de “manter a excelente coordinación existente entre todas as forzas para seguir contribuíndo a que O Barco de Valdeorras sexa un concello con baixos índices de criminalidade no contexto provincial”.
Á reunión de hoxe tamén asistiron a xefa da Unidade de Violencia sobre a Muller da Subdelegación do Goberno, María Alida Iglesias Gil; o xefe territorial da Consellería de Presidencia, Manuel Pardo Cid; responsables da Garda Civil e da Policía Local; e outros representantes do Concello.
Plan director
Como resposta á Comisión Provincial de Ourense do Plan Director, creada o pasado 3 de marzo, a Xunta Local de Seguridade introduciu como outro dos puntos da orde do día o Plan Director para a Convivencia e Mellora da Seguridade nos Centros Educativos e as súas Contornas para lograr unha maior coordinación.
Impulsarase a implicación da comunidade educativa, dos proxenitores e do alumnado para incrementar nos centros escolares de O Barco o número de charlas informativas dos equipos especializados das Forzas e Corpos de Seguridade sobre o uso das novas tecnoloxías, sobre o acoso escolar, sobre a violencia de xénero, sobre a prevención de condutas aditivas (consumo de alcohol e drogas, así como ludopatía) e outras actividades.
Igualmente se reforza con vixilancia da Policía Local e da Garda Civil nas inmediacións dos centros escolares para combater e previr o tráfico, consumo e tenencia de drogas, así como todo tipo de condutas violentas.