Non foi o resultado desexado. Non só porque era o primeiro partido da tempada e a posta de longo do renovado plantel do CD Barco, senón porque se disputaba en casa, no campo de Calabagueiros, e en plenas Festas do Cristo.
Na tarde deste domingo 11 de setembro arrancaba a liga en 3ª RFEF e o Barco de Javier Rey enfrontábase ao Arousa SC nun partido que perdían pola mínima, tras un solitario gol de Sylla avanzada xa a segunda metade. Na primeira, que remataba co 0-0 no marcador, notábase a tensión do primeiro encontro e a indecisión por parte dos xogadores de ámbolos dous equipos, con balóns despexados, pases longos e pouco xogo visual.
Tralo paso polo vestiario e cun sol que a media tarde aínda abrasaba, o xogador do Arousa sentenciaba o encontro sumando os tres primeiros puntos e relegando ao conxunto barquense ata o posto 11 da clasificación. A seguinte cita será no campo do CD Estradense que vén de perder contra o Vilalbés.
A pesares de ser un día con numerosas actividades por mor das festas, eran moitos os afeccionados que se achegaban ata Calabagueiros para ver o primeiro partido de liga, contando entre o público con Carla Gabián, coñecida por levar o fútbol a Tik Tok.
Fotos: Mónica G. Bellver.
