Un drama, unha aventura animada e unha comedia. Moi variada é a proposta de cine para esta fin de semana no Centro Cultural Avenida da Rúa con tres filmes de xéneros ben distintos.
A primeira proposta, para rodos os públicos, é Mediterráneo, un filme dramático baseado en feitos reais e con actores e actrices como Eduard Fernández, Dani Rovira ou Anna Castillo, entre outros.
A segunda, para o público familiar e especialmente o infantil, é La Patrulla Canina: La Película, cuxos protagonistas animados dan o salto á gran pantalla cunha aventura moi especial, sendo un dos grandes filmes de animación neste 2021.
E a terceira é galega, El cuarto de Mona, filme dirixido por Darío Autrán, protagonizado pola ourensá Sabela Hermida e rodada tamén en Ourense que narra as aventuras dunha muller en plena crise dos 40. A película, que definen como “comedia aloucada e frenética”, non se esquece da crítica social e pon ademais sobre a mesa a importancia da saúde mental.
Foi estreada no marco desta edición do Ourense Film Festival (OUFF) e na Rúa, será presentada polo seu director e a actriz protagonista, antes da proxección o domingo 21 de novembro.
