Trala celebración o ano pasado do Campionato galego de tiro con arco, o Club ArcoBarco tiña xa programada a XIII edición do seu Trofeo de sala, para as categorías sénior recurvo e composto, previsto para o sábado 26 de outubro no pavillón de Calabagueiros.
Mais antes de rematar setembro, a menos dun mes para a proba, dende o club comunicaban a suspensión da tirada, explicando que “o temporal de hai uns días provocou graves danos na cuberta do pavillón onde se ía celebrar sen que o Concello, a pesar do seu interese, nos poida garantir a reparación para esas datas”.
Ao ser valedeiro para a obtención de estrela FITA con participación internacional, no caso de celebrar a tirada noutro pavillón “teriamos que solicitar a homologación con todo o papeleo que supón polo que con esta premura sería inviable en canto a tempo”, explica o vicepresidente do club Martín Gómez Segura, indicando que, non poden arriscarse a celebralo igual e que chova, procedendo á súa suspensión canto antes, “para evitar na medida do posible os inconvintes, tanto para nós como para os tiradores rexistrados, procedendo ao reingreso das inscricións polo mesmo medio de pago”.
