Dentro da súa rolda de encontros institucionais que está tendo trala toma de posesión como novo representante da administración autonómica na área territorial, o delegado territorial da Xunta en Ourense, Gabriel Alén Castro, recibía na mañá deste luns 11 de xaneiro á Decana do Colexio de Economistas de Ourense, María del Carmen Sampayo. Nesta primeira toma de contacto, Alén Castro interesouse polo traballo que este colectivo profesional está a desenvolver e sobre os servizos que ofrecen aos seus colexiados.
O Colexio de Economistas de Ourense, como corporación que agrupa principalmente aos economistas profesionais desta provincia, foi creado o 7 de outubro de 2004, e desde entón está ao servizo de toda a sociedade en xeral e do colectivo dos seus colexiados en particular.
Como institución representativa da profesión de economistas, esta corporación ten como principal obxectivo fomentar o seu desenvolvemento e velar para que a actividade profesional ofreza á sociedade as garantías suficientes de calidade e competencia.
