Dende o servizo de información turística do Concello de O Bolo fan unha interesante proposta para o vindeiro 10 de decembro. Trátase dunha andaina que sairá á 10 da mañá dende o Museo Yosso, no casco urbano do Bolo, para “descubrir a vida, a obra e o lugar onde viviu un dos artistas máis destacados de Valdeorras: Yosso”, adiantan dende a organización.
Un percorrido duns 7 quilómetros (ida e volta), que permitirá coñecer os cadros e tamén a aldea na que o artista naceu e viviu boa parte da súa vida, Valbuxán, estando tamén moi presente a historia do propio concello.
A actividade é gratuíta con prazas limitadas e rematará cun viño. Para que o precise contarase coa colaboración de Protección Civil do Bolo para regresar ao punto de partida.
As reservas poden facerse no Concello de o Bolo e tamén chamando ao servizo de información turística: 606017105.
