Conferencias en torno á figura do patrón de Ourense especialmente na época visigoda de expertos de diferentes países, pero tamén visitas de campo por algúns dos lugares e edificios históricos máis emblemáticos da provincia de Ourense. Foros as bases sobre as que se asentou o Congreso Internacinal de San Martiño de Tours celebrado en Ourense no ano do 1.700 aniversario do nacimento do santo.
A última visita de estudo tiña lugar na mañá do venres 18 de novembro na quinta e última xornada, na que os participantes desprazáronse ata Cea, para realizar un pequeno tramo a pé da Vía da Prata do Camiño de Santiago con posterior visita guiada polo Mosteiro de Oseira.
As actividades continuaron pola tarde, nesta ocasión no Pazo de Vilamarín, retomando a temática abordada na xornada de onte sobre a evolución dos bispados na Gallaecia da época Sueva. O primeiro en intervir era Miguel Alba Calzado do Consorcio Monumental da Cidade de Mérida, para falar do proceso de cristianización da cidade dos século V ao VII. Seguidamente era a quenda para Luis O. Fontes da Unidade de Arqueoloxía da Universidade do Minho (Braga), cun relatorio sobre a evolución da cidade de Braga, ao norte de Portugal, que foi a capital do Reino Suevo, tanto da cidade como do seu territorio inmediato nos séculos V e VI, pois Dumio, que se atopa ao carón de Braga, foi un Mosteiro fundado por San Martín de Dumio.
Tralo descanso, Lino Augusto Tavares Dias do Centro de Estudos de Arquitectura e Urbanismo da Universidade do Porto, falou da cidade de Tongobriga na localidade de Freixo, preto do Porto, na antigüidade tardía. E finalmente Virgilio Lopes do Campo Arqueolóxico de Mértola, abordaba o tema da evolución de Mértola desde a súa etapa como porto romano ao bispado dos séculos V ao VII, antes do acto de clausura.