O Concello de Viana do Bolo traballa para obter o recoñecemento de interese turístico estatal para o seu Entroido. Facíao público o seu alcalde, o nacionalista Secundino Fernández, na mañá do 17 de marzo, durante a visita que realizaba a este concello ourensán a portavoz nacional do BNG, Ana Pontón.
“Estamos preparando a documentación para solicitar esta declaración estatal e despois tamén como Ben de Patrimonio Inmaterial, algo que tamén forma parte do proceso”, comentaba Secundino Fernández. O Entroido vianés, xunto coa Festa da Androlla, xa conta dende hai anos co selo de festa de interese turístico galego.
Hai xa outros Entroidos ourensáns que xa contan con este recoñecemento español como é o caso do de Xinzo da Limia e Verín.
