Este sábado 25 de outubro a Casa da Cultura de Petín acollerá a presentación do libro E dobraron as campás en Petín de Valdeorras (Ed. Sindéresis, 2025) de Luis Posse Vidal.
Con coñecemento de causa, o autor mestura nesta obra de agradable lectura, recordos infantís novelados con personaxes ficticios e outros francamente recoñecibles, “con lixeireza e desenfado, pasando con nota alta a difícil materia da descrición de paisaxes e personaxes, habitual escollo aínda nos máis grandes e recoñecidos autores. Bástame con lembrar as anestésicas descricións campestres de Chejov ou situacionais de Thomas Mann para apreciar a nada fácil sinxeleza da narrativa possiana”, asegura no prólogo Fernando J. Ponte Hernando, Académico numerario de Historia da Medicina da RAMG.
Ao longo de 126 páxinas, Luis fala con “frescura e coñecemento dos lugares e personaxes típicos e arquetípicos da Rúa Petín que, por experiencia e referencias familiares tan ben coñece”, conducindo ao lector polo “recorrente tema da morte botando man do realismo máxico que, sen dúbida, naceu en Galicia, varias décadas antes das súas máis contemporáneos cultivadores hispanoamericanos”.
A presentación será ás 19:30 horas e ao remate haberá degustación de viño de Valdeorras e petiscos.
