Para as oito da tarde do 28 de maio estaba previsto no Concello da Rúa o Pleno extraordinario solicitado polo Partido Popular con tres puntos na orde do día. O primeiro, iniciar a tramitación para ter unha persoa, que sexa secretario-interventor dos Concellos da Rúa e Petín a maiores do tesoureiro; o segundo, valoración do estado económico e social do Concello da Rúa; e o terceiro, facultar e encomendar ao alcalde a realización de todos os trámites necesarios para levar a cabo o acordo primeiro.
Unha vez lido o primeiro punto, o alcalde Luis Fernández Gudiña cedía a palabra ao portavoz da oposición que sorprendía aos asistentes facendo constar “a nosa queixa porque o punto importante deste Pleno era o estado económico do Concello e neste momento non temos ningún tipo de documentación e imos proceder a levantarnos. Cando teñamos as contas que poidamos estudar a tempo e con tempo, procederemos a solicitar un novo”.
Sen deixar ao alcalde dar as explicacións oportunas os cinco membros do PP rues abandonabaon o salón ante a atónita mirada do grupo de Goberno. Acto seguido o propio alcalde explicaba que o Partido Popular solicitara a través dun escrito un Pleno Extraordinario para coñecer entre outros puntos, o estado das contas, “unha posibilidade que ten calquera grupo pero que tamén podía ter solicitado a través dunha comisión ou un escrito dirixido ao Concello solicitando esa documentación. O equipo de Goberno entendeu que a documentación debería dárselle no acto que eles pediron e nós aquí a temos e pasariamoslla con moito gusto”, dixo, asegurando que “paréceme unha verdadeira falta de respecto a este Pleno que non queiran saber dos puntos que eles mesmos solicitaron”.
A portavoz do BNG e tenente e alcalde María G. Albert unicamente dixo estar “sorprendida de que soliciten un Pleno extraordinario para levantarse del. Nós traballamos e trouxemos os deberes feitos”. Segundo o alcalde “toda a documentación está aquí e podemos presentarlla e eles cando nola soliciten. Foi a través do Pleno así que aquí a tiñamos para contestar ás súas preguntas. Parece unha pataleta e esperemos que soliciten un novo Pleno se queren ter a información, senón recibirana cando o equipo de Goberno convoque a comisión correspondente”.
Fotos: Mónica G. Bellver.