Na tarde deste luns 7 de maio era o partido socialista quen presentaba, na súa sede sita na rúa Miguel de Cervantes, a candidatura coa que concorrerá ás eleccións do 28 de maio no Concello da Rúa. Unha candidatura que tal como explicou o cabeza de lista, Luis Fernández Gudiña, está formada por quince persoas, 8 homes e 7 mulleres, coa peculiaridade de que “nos 5 primeiros postos o 60% son mulleres e o 40% homes”.
Unha lista “con xente de practicamente todos os núcleos de poboación do concello, o que nos dá unha visión global da situación do municipio e permitiranos, nun futuro, coñecer a problemática de cada unha desas zonas para poder darlle resposta canto antes”, dixo Luis. Cunha renovación do 25%, conxuga a experiencia que ter gobernado xa no concello e ter estado na oposición, coa incorporación de xente nova que “dará ese zume novo para emprender este camiño con máis ilusión se cabe”, asegurou o candidato socialista á alcaldía da Rúa.
“Sempre A Rúa” será, tal como explicou Fernández Gudiña, o slogan da súa candidatura “porque dende logo o noso obxectivo prioritario será ser útil aos veciños e veciñas da Rúa e para nós, ser útil significa atender á xente, escoitar, saber cales son os seus problemas e tratar de resolver as súas necesidades canto antes”.
Acompañado por boa parte dos compañeiros cos que concorrerá aos comicios do 8M co obxectivo de conseguir o mellor resultado posible, Luis asegurou que a súa candidatura preséntase “con máis ilusión e ganas que nunca e co convencemento de que os veciños e veciñas da Rúa saberán aprezar a seriedade e fiabilidade da nosa proposta e nos concederán a responsabilidade de gobernar os vindeiros catro anos”.
Proximamente darán a coñecer o seu programa electoral que “nace fundamentalmente das reunións que tivemos nos meses de marzo e abril coas distintas asociacións de veciños, culturais e deportivas e que se desenvolverá en torno a seis grandes bloques”, concluía Fernández Gudiña.
CANDIDATURA:
- Luis Fernández Gudiña
- Ana Fernández Vizcaya
- M. Carmen Álvarez Fernández
- Verónica Martínez Salví
- Francisco J. Sánchez Fernández
- José Rodríguez Gómez
- Rita Lorenzo Barrio
- Gema Fernández Vizcaya
- Víctor Nogueira Menéndez
- Carlos Aristegui Diéguez
- José Manuel Cebey Rodríguez
SUPLENTES:
- Elio Rodríguez Taín
- Cristina Fernández Santás
- Vera Prada Fernández
- Antonio Pedreira Sago
Fotos: Carlos G. Hervella.
Vídeo: Mónica G. Bellver.
